- A visita guiada terá lugar este domingo, 4 de decembro, e incluirá paradas na fraga de Areosa, a contorna das brañas de Valga e o castelo de Mesía.
- As persoas interesadas poderán inscribirse ata o día 2 de decembro en info@viaxesalumar.com ou no 678 776 951.
A Mancomunidade de Municipios da Comarca de Ordes dálle continuidade á iniciativa ‘Os lugares do paraíso’, coa segunda visita guiada que terá lugar este domingo, 4 de decembro, en Mesía.
Logo da boa acollida recibida na primeira actividade que tivo lugar en Frades, o concello mesiense será o escenario escollido para seguir aproximándose ao patrimonio natural, cultural e gastronómico da comarca.
Deste xeito, a saída de domingo iniciarase cunha visita á fraga de Areosa, un espazo natural de gran valor medioambiental debido á frondosidade e diversidade da súa flora.
A continuación, a actividade continuará nas brañas de Valga, atopadas na parroquia de Visantoña, unha paraxe marcada polas súas lagoas no que se integra a Aula de Natureza e Centro de Interpretación do Barro, con información sobre o espazo e o seu pasado como punto de extracción deste material.
A derradeira parada da xornada terá lugar no castelo ou torre-fortaleza de Mesía, unha edificación militar datada do século XV da cal se conservan as defensas exteriores logo de ser derrubada nas revoltas Irmandiñas e restaurada posteriormente por Alonso II de Fonseca.
A saída terá lugar desde a rúa Entreparques de Ordes ás 09.30 horas e a hora de chegada está prevista para as 14.30 horas.
As persoas interesadas en participar poderán realizar a súa inscrición de balde ata o venres, 2 de decembro, a través do enderezo info@viaxesalumar.com ou chamando ao 678 776 951.